">
- अर्थ सरोकार सम्बाददाता
काठमाडौं । नेपालका २१ जिल्लामा कोरोना भाइरसको संक्रमण फैलिएको छ । मंगलबार एकै दिन ८३ जनामा संक्रमण पुष्टि भएसँगै संक्रमण फैलिएको जिल्लाको संख्या २१ पुगेको हो । मंगलबार दिउँसो ५७ र बेलुका २६ जना संक्रमित थपिएका थिए । जसमा दुई नयाँ जिल्ला भक्तपुर र महोत्तरी पनि परेका छन् । जहाँ २/२ जनामा संक्रमण पुष्टि भएको छ।
नेपालमा कोरोना संक्रमितको संख्या २१७ पुगेको छ । सबैभन्दा बढी संक्रमित पर्सा जिल्लामा छन् । पर्सामा ८२ जनामा संक्रमण पुष्टि भएको छ । दोस्रोमा बढी संक्रमित भएको जिल्ला उदयपुरमा ३२ जना रहेका छन् । कपिलवस्तुमा २९, बाँकेमा २४ र रुपेन्देहीमा १६ जना संक्रमित छन् । यस्तै काठमाडौंमा ५, कैलालीमा ४, बारामा ३, रौतहटमा ३, धनुषामा ३, चितवनमा २, झापामा २, वाग्लुङमा २ र सर्लाहीमा २ जनामा संक्रमण पुष्टि भएको छ ।
कञ्चनपुर, बर्दिया, धादिङ, सप्तरी र भोजपुरसहितका पाँच जिल्लामा भने एक जना मात्रै कोरोना संक्रमित रहेका छन् । ३३ जना उपचारपछि निको भएर घर फर्किएका छन् ।
