• अर्थ सरोकार सम्बाददाता 

काठमाडौं । भारतले अष्ट्रेलियामा अलपत्र परेका आफ्न नागरिकहरुलाई उद्धार गर्ने क्रममा तीन जना नेपालीलाई पनि नयाँदिल्ली ल्याएको छ । कास्की घर भएका अर्जुन प्रसाद तिमिल्सिना, विश्व तिमिल्सिना र मुक्तिप्रसाद तिमिल्सिनालाई भारतीय नागरिकहरुसँगै नयाँदिल्ली ल्याइएको हो । उनीहरु बाबु–छोराहरु हुन् । एकजना छोरा बोनम्यारो सम्बन्धी विरामी छन् । अर्का छोराले बोनम्यारो दान गर्नेछन् भने बुवा हेरचाहका लागि हुनेछन् ।

बोनम्यारो प्रत्यारोपण गर्नुपर्ने बिरामी भएकाले अष्ट्रेलियास्थित नेपाली दूतावासले गरेको अनुरोधमा उनीहरुलाई दिल्लीसम्म पुर्याइदिन भारतीय दूतावासले जनाएको छ । काठमाडौंस्थित दूतावासका अधिकारीहरुले पनि यो कुरा पुष्टि गरेका छन् ।

काठमाडौंस्थित भारतीय दूतावासका एक अधिकारीका अनुसार ती नेपालीहरुलाई दिल्लीस्थित बीएलके अस्पतालमा पुर्याइने छ । ‘तीनैजना नेपालीमा कोरोना संक्रमण नभएको र यात्रा गर्न सुरक्षित रहेको भनेर अष्ट्रेलियाको एक अस्पतालले कागज बनाइदिएको छ,’ काठमाडौंस्थित भारतीय दूतावासका एक अधिकारीले भने, ‘तर पनि उनीहरु निश्चित अवधिसम्म बीएलके अस्पतालको क्वारेन्टाइनमा रहनेछन् ।’