• अर्थ सरोकार सम्बाददाता 

काठमाडौं – विश्वव्यापी महामारीको रुपमा फैलिएको कोरोना भाइरसको संक्रमण दिनप्रति दिन बढ्दै गईरहेको छ । चीनको वुहानबाट शुरु भएको कोरोना संक्रमणको दर यूरोपियन मुलुक हुँदै पछिल्लो समय अमेरिकामा तीव्र देखिएको हो ।

अमेरिकामा पछिल्लो २४ घण्टामा १ हजार ६४३ जनाले ज्यान गुमाएका छन् । योसँगै अमेरिकामा मृत्यु हुनेको संख्या ६७ हजार ३९६ पुगेको छ । अमेरिकामा एकैदिन २८ हजार ५३४ बढीमा संक्रमण देखिएसँगै संक्रमितको संख्या ११ लाख ५९ हजार ५६४ पुगेको छ ।

अमेरिकामा संक्रमितमध्ये १ लाख ६० जना ७०५ उपचारपछि निको भएका छन् । १६ हजार ४७५ जनाको अवस्था गम्भीर रहेको छ । ९ लाख ३१ हजार ४६३७ जना उपचाररत छन् ।

बेलायतमा पनि पछिल्लो २४ घण्टाको तथ्यांक हेर्ने हो भने विश्वमा अमेरिकापछि बेलायतमा धेरैले ज्यान गुमाएका छन् । पछिल्लो २४ घण्टामा अमेरिकामा १ हजार ६९१ जनाले ज्यान गुमाएका थिए भने बेलायतमा ६२१ जनाले ज्यान गुमाएका छन् ।

बेलायतमा पछिल्लो २४ घण्टामा ६२१ जनाले ज्यान गुमाएसँगै मृत्यु हुनेको संख्या २८ हजार १३१ पुगेको छ । बेलायतमा एकैदिन ४ हजार ८०६ जनामा संक्रमण देखिएसँगै संक्रमित हुनेको संख्या १ लाख ८२ हजार २६० पुगेको छ । बेलायतमा संक्रमितमध्ये १ लाख ५३ हजार ७८५ जना उपचाररत छन् । १ हजार ५५९ जनाको अवस्था गम्भीर रहेको जनाइएको छ । 

इटालीमा ज्यान गुमाउनेको संख्या २८ हजार ७१० पुगेको छ । इटालीमा पछिल्लो २४ घण्टामा ४७४ जनाले ज्यान गुमाएको छ । साथै, १ हजार ९ सय जनामा संक्रमण देखिएको छ । यो संगै संक्रमितको संख्या २ लाख ९ हजार ३२८ पुगेको छ । इटालीमा संक्रमितमध्ये ७९ हजार ९१४ जना उपचारपछि निको भएका छन् । १ हजार ५३९ जनाको अवस्था गम्भीर रहेको जनाइएको छ । १ लाख ७०४ जनाको विभिन्न अस्पतालमा उपचार भइरहेको छ ।

विश्वभरीमा कोरोनाबाट २ लाख ४४ हजार ५ सय ९६ जनाको मृत्यु भइसकेको छ भने संक्रमितको संख्या ३४ लाख ७९ हजार ८ सय ७५ पुगेको छ । संक्रमितहरुमध्ये ११ लाख ८ हजार ६५ जना निको भएर घर फर्किसकेका छन् ।