• अर्थ सरोकार सम्बाददाता 

वीरगञ्ज । बाराको बिश्रामपुर गाउँपालिका वडा नं. ४ बलिरामपुरमा नेपाली र भारतीयबीच झडप भएको छ । बिहान भएको झडपमा केही नेपाली घाइते भएका छन् । झडपमा अशोक कुमार साह, कमलेश शर्मा, हिरालाल शर्मा, दीपक शर्मा, छोटेलाल साह, मदन साह लगायत घाइते छन् । अशोकको टाउकोमा चोट लागेको छ ।अन्यको अवस्था सामान्य रहेको वडा अध्यक्ष मदन प्रसाद यादवले जानकारी दिए । 

‘खेतमा काम गर्न गएका स्थानीयलाई एसएसबीले कुटपीट गरेपछि स्थिति बिग्रिएको हो । दुवैतिरबाट सर्वसाधारण झडपमा उत्रिएका थिए,’ उनले भने, ‘नेपाली सुरक्षाकर्मीको तुलनामा भारतीय सुरक्षाकर्मी बढी आएका थिए ।’ सीमा क्षेत्रमा स्थानीय छोटेलाल साहको १५ कठ्ठा खेत छ । पानी परिरहेकाले खेत जोत्नका लागि योग्य छ कि छैन भनी उनी हेर्न गएका थिए । खेतमै रहेको अवस्थामा भारतीय सशस्त्र सीमा बल (एसएसबी)का जवानले कुटपीट गरेको उनी बताउँछन् ।

‘खेतको बीच भागमा पुगेको थिएँ, एसएसबीले आएर घर्यो, समातेर सीमामा हिँड् भन्दै थिए । दुईचार डण्डा पनि लगाइहाले,’ उनले भने । आफूलाई एसएसबीले ज्यादती गरेको भन्दै उनले गाउँलेसँग गुहार मागेका थिए । त्यसपछि स्थानीय प्रतिकारमा उत्रिएका थिए । एसएसबीविरुद्ध नेपालीहरु जाइलागेपछि भारतीय पनि लाठी भाटा लिएर आएपछि स्थिति तनावपूर्ण बनेको थियो । पछि दुवै तर्फका सुरक्षाकर्मीले स्थानीयलाई सम्झाइबुझाइ गरेर स्थिति सामान्य पारेका थिए । बाराका सशस्त्र प्रहरी उपरीक्षक दिगविजय सुवेदीले लकडाउनका कारण दुवैतर्फका मानिसहरु तनावमा रहेकोले सामान्य विवाद भएको बताए ।