- अर्थ सरोकार सम्बाददाता
काठमाडौं – बीमा समितिले कोरोना बीमा पोलिसी ल्याएसंगै पछिल्लो समय यो बीमा गराउनेको संख्या ह्वात्तै बढेको छ । अहिलेसम्म २५ हजार व्यक्तिले कोरोना बीमा गरेको बीमा समितिले जनाएको छ । कोरोनाले विश्वभर माहामारीको रुप लिएपछि बीमा समितिले बढी क्षति नहुनका लागि कोरोना बीमा पोलिसी ल्याएको थियो ।
वैशाख ७ गतेदेखि शुरु भएको कोरोना बीमा अन्तर्गत हालसम्म १ करोड ३५ लाख रुपैयाँ प्रिमियम संकलन भएको बीमा समितिका अध्यक्ष चिरञ्जीवि चापागाईले बताएका छन् । उनका अनुसार कोरोना बीमाका दुई वटै बीमा प्रोडक्टबाट उक्त प्रिमियम संकलन भएको हो ।
कोरोनले बीमा क्षेत्रमा असर परेको उल्लेख गर्दै अध्यक्ष चापागाईले आगामी वर्षमा ठूलो असर पर्ने बताए । आइक्यानले आयोजना गरेको भिडियो कन्फ्रेन्स कार्यक्रममा बोल्दै उनले यो वर्ष जीवन बीमा २०/२२ प्रतिशत र निर्जीवन बीमा २/३ प्रतिशतले बढ्ने आँकलन गरिएको बताए ।
