- अर्थ सरोकार सम्बाददाता
दैलेख । कोरोना भाइरसका करण मृत्यु भएका कर्णालीका पहिलो व्यक्तिको शव शनिबार राति नै व्यवस्थापन गरिएको छ । नेपाली सेनाको सहयोगमा दुल्लु नगरपालिकाले दैलेखका ती मृतकको शव राति नै जंगलमा व्यवस्थापन गरिएको हो ।
नगर प्रमुख घनश्याम भण्डारीले दुल्लु नगरपालिका–५ मा रहेको शिद्धस्थली जंगलको बीचमा शब व्यवस्थापन गरिएको जानकारी दिए । शब व्यवस्थापन गर्दा सुरक्षाका सबै विधि पूरा गरिएका उनले बताए ।
भारतको गुजरातबाट आएका ३५ वर्षीय व्यक्तिको शनिबार बिहान क्वारेन्टाइनमै मृत्यु भएको थियो । उनी चिया पिएर बेडमा जाँदै गर्दा एक्कासि बेहोस भएर लडेका थिए । उनको स्वाबको रिपोर्ट पोजिटिभ आएपछि संक्रमितको शबलाई व्यवस्थापन गर्ने विधिअनुसार बस्तीदेखि टाढाको जंगलको बीचमा व्यवस्थापन गरिएको हो । कोरोना संक्रमणबाट मृत्यु हुने उनी सातौं व्यक्ति हुन् । नेपालमा कोरोना संक्रमितको संख्या १४ सय नाघेको छ भने ७ जनाको ज्यान गएको छ । यस्तै निको हुनेको संख्या २ सय नाघेको छ । पछिल्लो समय नेपालमा भारतबाट आउने नेपालीको संख्या बढेको छ । जसकारणले नेपालमा संक्रमितको संख्या पनि बढेको छ ।
