- अर्थ सरोकार सम्बाददाता
काठमाडौं । भारतमा लकडाउनलाई केहि खुकुलो बनाइएको छ । भारत सरकारले लकडाउनलाई केहि खुकुलो पार्ने निर्णय गरेसँगै मदिरा पसल पनि खोल्न दिने निर्णय गरेको छ ।
सोमबार राजधानी सहर दिल्लीमा रहेको देशबन्धु गुप्ता सडकमा रहेको एक मदिरा पसलमा मदिरा खरिद गर्ने मानिसको लामो लाइन देखिएको छ । भारतीय समाचार संस्था एएनआईका अनुसा उक्त पसलमा मदिरा खरिद गर्न आउने मानिसको लाइन एक किलोमिटरभन्दा लामो रहेको छ । भारतले सोमबारदेखि मुलुकमा कोरोना भाइरसको जोखिमको आधारमा छुट्याइएको ‘रेड’, ‘अरेन्ज’ र ‘ग्रिन’ जोनहरुमा मदिरा पसल खोल्न दिने निर्णय गरेको थियो । तर, यसरी पसल खोल्दा ग्राहकबीच कम्तीमा ६ फिटको भौतिक दूरी भने कायम राख्नुपर्ने हुन्छ ।
एएनआईका अनुसार दिल्लीका साथै अन्य सहरमा पनि मदिरा किन्ने मानिसको भीड बढेको छ । मानिसहरुले सरकारले तोकेको भौतिक दूरीको नियम पनि मानेका छैनन् । भीड नियन्त्रणको लागि केही स्थानमा प्रहरीले लाठीचार्जसमेत गरेको छ ।
दिल्लीको झील चोक क्षेत्रको एक मदिरा पसल मानिसहरुको भीड थेग्न नसकेपछि प्रहरीले बन्द गराएको छ । दिल्लीका विभिन्न स्थानमा रहेका एक सय ५० मदिरा पसल सोमबारदेखि खुलेका हुन् । त्यस्तै कर्नाटक, छत्तिसगढलगायत विभिन्न राज्यमा पनि मदिरा पसल खुलेसँगै बिहानैदेखि मानिसहरु लाइनमा बसेका थिए । भारतमा कोरोना भाइरसका कारण अहिलेसम्म ज्यान गुमाउनेको संख्या झन्डै १ हजार ४ सय नजिक छ भने संक्रमिटको संख्या ४२ हजार नाघेको छ ।
