• अर्थ सरोकार सम्बाददाता 

काठमाडौं । नेपाल पानी जहाज कार्यालयले १ करोड ४३ लाख बराबरको गाडी किन्ने भएको छ । भौतिक पूर्वाधार तथा यातायात मन्त्रालय अन्तर्गतको उक्त कार्यालयले बुधबार एक सूचना जारी गर्दै फागुन ८ गते गोरखापत्रमा प्रकाशित सूचना अनुसार गाडी खरिदको लागि कम्पनी छनोट गरेको जानकारी दिएको हो ।

कार्यालयले १ करोड ४३ लाख ९८ हजार बराबरको चार पांग्रे एसयूभी गाडी किन्न लागेको हो । कोभिडविरुद्ध लड्न खर्च अभाव हुनसक्ने भन्दै अर्थ मन्त्रालयले विभिन्न १४ शीर्षकहरुमा खर्च प्रतिवन्ध लगाएको छ । सरकारले बजेट विनियोजन भएका क्षेत्रमासमेत खर्च गर्न रोक लगाएको छ। तर, चैत २० अघि बोलपत्र आव्हान भइसकेका कार्यक्रममा रकम निकासा गर्न बाधा नहुने सरकारी नीति छ । गाडी खरिदको बोलपत्र फागुन ८ गते नै भइसकेकाले गाडी खरिद गर्न लागिएको कार्यालयले जनाएको छ।