• अर्थ सरोकार सम्बाददाता 

जुम्ला । जुम्लामा आठ सय ४९ जनाको कोरोना परिक्षण गरिएको छ । कर्णाली स्वास्थ्य विज्ञान प्रतिष्ठानले सोमबार जिल्लाका आठ सय ४९ जनाको कोरोना परिक्षणका लागि स्वाब संकलन गरेको हो । प्रतिष्ठानको प्रयोगशालाका प्रमुख विवेक पुन मगरले आठ सय ४९ जनाकै स्वाब परीक्षण रिपोर्ट रिपोट नेगेटिभ आएको बताएका छन् । प्रतिष्ठानको टोलीले लकडाउन अवधिमा बाहिरबाट आएकाहरुको स्वाब एकै दिनमा संकलन गरेको थियो ।

सबैको रिपोट नेगेटिभ आएको र कोरोना प्रतिकार्यका लागि थप योजना बनाएर काम गर्न लागिएको प्रतिष्ठानका निर्देशक डा.मंगल रावलले बताएका हुन् । लकडाउन अवधिमा भारत तथा तेस्रो मुलुक र जिल्ला बाहिरबाट आएकाहरू सबैको रिपोट नेगेटिभ आएपछि जुम्ला सुरक्षित छ भन्ने महसुस भएको चिकित्सकहरूले बताएका छन् ‌। प्रतिष्ठानले बाहिर जिल्लाबाट आएकाहरु र शंका लागेका व्यक्तिहरुको कोरोना भए/नभएको थाहा पाउन स्वाब संकलन गर्न थालेको छ । कर्णाली प्रदेश सरकारले कोराना भाइरसको प्रतिकार्य रोकथाम तथा नियन्त्रण कार्यलाइ प्रभावकारी बनाउन १० वटै जिल्लामा स्वास्थ्यकर्मी परिचालन गरेको छ।