- अर्थ सरोकार सम्बाददाता
काठमाडौं – आज (सोमबार) भेटिएका कोरोना संक्रमित व्यक्तिहरु भारतबाट आएका खुलेको छ । कपिलवस्तुका प्रमुख जिल्ला अधिकारी दीर्घनारायण पौडेलले कपिलवस्तुमा भेटिएका १० जना नयाँ संक्रमित पनि भारतबाटै लुकिछिपी नेपाल भित्रिएको पाइएको बताए ।
प्रमुख पौडेलका अनुसार उनीहरु भारतको मुम्बई, दिल्लीलगायतका ठाउँबाट आएका थिए । तर उनीहरु कहिले नेपाल भित्रिए भन्ने बारे सही जानकारी पत्ता लगाउन बाँकी रहेको पौडेलले बताए । उनीहरु कपिलवस्तुको यशोधरा गाउँपालिकास्थित अनिरुद्र उच्च माध्यमिक विद्यालयमा रहेका क्यारेन्टाईनमा बसेका थिए ।
अहिले उनीहरुलाई बुटवलस्थित कोरोना बिशेष अस्थायी अस्पतालमा ल्याउने तयारी भएको छ । यसअघि कपिलवस्तुमै फेला परेका संक्रमितहरु पनि दुवै देशमा लकडाउन जारी रहेकै बेला भारतबाटै लुकिछिपी नेपाल भित्रिएका थिए। अघिल्ला संक्रमित र नयाँ संक्रमितहरुबीच सम्बन्ध र सम्पर्कबारे पनि पत्ता लाग्न बाँकी रहेको प्रजिअ पौडेलले बताए । नयाँ संक्रमितसँगै कपिलबस्तुमा कोरोना संक्रमितहरुको संख्या १५ पुगेको छ भने नेपालभर १२० जना पुगेका छन् । यस्तै निको हुनेको संख्या भने ३१ पुगेको छ ।
