">
- अर्थ सरोकार सम्बाददाता
काठमाडौं – मन्जुश्री फाइनान्सले चालु आर्थिक वर्षको तेस्रो त्रैमासको वित्तीय विवरण सार्वजनिक गरेको छ । सार्वजनिक गरेको विवरण अनुसार फाइनान्सले अधिकांश सूचकमा आकर्षक प्रगति गरको छ । यो चैत मसान्त सम्ममा फाइनान्सले १९ करोड ३२ लाख २७ हजार रुपैयाँ खुद नाफा कमाएको छ । यो नाफा गत वर्षको सोही अवधिको तुलनामा ३२२.४७% ले बढी हो । गत वर्ष यस संस्थाले ४ करोड ५७ लाख ३७ हजार रुपैयाँ मात्र खुद नाफा कमाएको थियो ।
यस्तै संस्थाको खुद ब्याज आम्दानी र सञ्चालन नाफा क्रमशः ५३.९१% र १८७.८४% ले वृद्धि भएको छ । गत वर्ष १८ करोड ९१ लाख ७१ हजार रुपैयाँ खुद ब्याज आम्दानी गरेको संस्थाले यो त्रैमासमा बढाएर २९ करोड ११ लाख ५५ हजार पुर्याएको छ । यस्तै, सञ्चालन नाफा पनि ५ करोड ६५ लाख रुपैयाँबाट बढाएर १६ करोड २७ लाख पुर्याउन सफल भएको छ । हाल मन्जुश्रीको चुक्ता पुँजी ८१ करोड ८१ लाख ३१ हजार रुपैयाँ रहेको छ भने रिजर्भ कोषमा १९ करोड ७२ लाख रुपैयाँ छ ।
यो तेश्रो त्रैमाससम्ममा ५ अर्ब ५० करोड रुपैयाँ निक्षेप संकलन गरी ५ अर्ब ६१ करोड रुपैयाँ कर्जा लगानी गरेको छ । यता, कम्पनीको खराब कर्जा भने २.९६% बाट बढेर ३.४३% पुगेको छ । मन्जुश्रीको प्रतिसेयर आम्दानी ३१ रुपैयाँ ४९ पैसा (वार्षिक) र प्रतिसेयर नेटवर्थ १२५ रुपैयाँ ०८ पैसा छ ।
