- अर्थ सरोकार सम्बाददाता
काठमाडौँ । नेपाल एसबिआई बैंक लिमिटेडले चालु आर्थिक वर्षको तेस्रो त्रैमासिक वित्तीय विवरण प्रकाशित गरेको छ । बैंकले प्रकाशित गरेको विवरण अनुसार बैंकको नाफा गत आर्थिक बर्षको सोहि अवधिको तुलनामा घटेको छ । बैंकले सार्वजनिक गरेको विवरण अनुसार बैंकले चैत मसान्तसम्ममा १ अर्ब ४३ करोड ८२ लाख रुपैयाँ खुद नाफा आर्जन गरेको छ । गत आर्थिक बर्षको सोहि अवधिमामा बैंकले १ अर्ब ६० करोड ६ लाख रुपैयाँ खुद नाफा कमाएको थियो। अर्थात यो आर्थिक बर्षको नाफा अघिल्लो आर्थिक बर्षको सोहि अवधिको तुलनामा १६ करोड २४ लाख रुपैयाँले कम हो ।
बैंकको खुद ब्याज आम्दानीमा कमी आएपछि खुद मुनाफा घटेको हो । चालु आर्थिक बर्षको तेस्रो त्रैमासको अन्त्यसम्ममा बैंकले ३ अर्ब १३ करोड ९८ लाख रुपैयाँ खुद ब्याज आम्दानी गरेको छ । यो ब्याज आम्दानी गत आवको सोही अवधिको तुलनामा २१ करोड ७३ लाख रुपैयाँ कम हो । समीक्षा अवधिमा बैंकको सञ्चालन मुनाफा १५ करोड ४३ लाख रुपैयाँ घटेर २ अर्ब ४ करोड ९१ लाख रुपैयाँमा सीमित भएको छ ।
खुद नाफा घटेसँगै बैंकको प्रतिशेयर आम्दानीमा पनि घटेको छ । गत आवको चैत मसान्तमा २५ रुपैयाँ २६ पैसा रहेको बैंकको यस्तो आम्दानी चालु आवको सोही अवधिमा घटेर २१ रुपैयाँ ४१ पैसामा खुम्चिएको छ । बैंकको प्रतिशेयर नेटवर्थ १६३ रुपैयाँ ७२ पैसा रहेको छ भने मूल्य आम्दानी अनुपात १९.२४ गुणा रहेको प्रकाशित विवरणमा उल्लेख छ ।
८ अर्ब ९५ करोड ६२ लाख रुपैयाँ चुक्ता पूँजी रहेको यस बैंकको जगेडा कोषमा ५ अर्ब १६ करोड ७९ लाख रुपैयाँ र शेयरधनी कोषमा ५३ करोड ५१ लाख रुपैयाँ सञ्चित छ । बैंकले सो अवधिसम्ममा १ खर्ब ७ अर्ब रुपैयाँ निक्षेप संकलन गरी ९५ अर्ब २१ करोड रुपैयाँ कर्जा प्रवाह गरेको छ । सो अवधिसम्ममा बैंकको वितरण योग्य मुनाफा १० करोड ४३ लाख रुपैयाँ रहेको छ । बैंकको निष्क्रिय कर्जा ०.१९ प्रतिशत रहेको छ।
