• अर्थ सरोकार सम्बाददाता 

धनकुटा । प्रदेश नं.१ का ९ जिल्लामा कोरोना संक्रमण फैलिएको छ । शनिवार संखुवासभामा कोरोना संक्रमित भेटिएसँगै कोरोना भाइरस ९ जिल्लामा फैलिएको हो । बिराटनगर स्थित कोशी अस्पतालको प्रयोगशालामा गरिएको परीक्षणमा संखुवासभाको खाँदबारीका २३ बर्षीय पुरुष र पाँचखपनका २२ बर्षीय पुरुषमा संक्रमण भेटिएको स्वास्थ्य तथा जनसंख्या मन्त्रालयले जनाएको छ । संखुवासभाका दुई र झापाका थप एक जनामा कोरोना संक्रमण पुष्टि भएसँगै प्रदेश १ मा कोरोना संक्रमितको संख्या १६० पुगेको छ । 

जसमा ३० जना भने निको भइसकेका छन् ।  प्रदेश १ मा सबैभन्दा बढी झापामा १०६ जनामा कोरोना संक्रमण देखिएको छ । त्यस्तै उदयपुरमा ३३, धनकुटामा ७, मोरङ ६, सुनसरीमा ३ र संखुवासभामा २ जनामा संक्रमण देखिएको हो । यता खोटाङ, भोजपुर र सोलुखुम्बुका एक/एक जनामा कोरोना संक्रमण पुष्टि भएको छ ।

प्रदेश १ का १४ जिल्ला मध्ये पाँचथर, ईलाम, तेह्रथुम, ताप्लेजुङ र ओखलढुंगामा कोरोना संक्रमित भेटिएका छैनन् ।