• अर्थ सरोकार सम्बाददाता 

पर्वत – पर्वतमा अन्तरजिल्ला सवारी साधनको पास वितरण बन्द गरिएको छ । कोरोना भाइरसको सङ्क्रमणबाट जिल्लालाई जोगाउन सवारी साधनको पास वितरण बन्द गरिएको हो । जिल्ला प्रशासन कार्यालयले सोमबार एक सूचना प्रकाशित गर्दै अर्को सूचना जारी नभएसम्मका लागि पर्वत जिल्लाभन्दा बाहिर जाने सवारी साधनका लागि पास वितरण गर्न स्थगित गरिएको जनाएको छ । 

प्रमुख प्रशासकीय अधिकृत घनश्याम गौतमद्वारा जारी सूचनामा बन्दाबन्दीको अवधिमा अत्यावश्यक पसलबाहेक अन्य पसलहरु बन्द गर्न पनि आग्रह गरिएको छ । त्यसैगरी जिल्ला भित्रिनेहरुका लागि स्वास्थ्य चेकजाँचमा कडाइसमेत गरिएको छ । पर्वतलगायत धौलागिरिमा भित्रिने मुख्य नाका पर्वतको मोदी गाउँपालिकास्थित डिमुवामा रहेको हेल्थ डेस्कमा मात्रै आठ हजारभन्दा बढीको स्वास्थ्य जाँच गरिएको मोदी गाउँपालिकाले जनाएको छ । नेपालमा कोरोना संक्रमितको संख्या ७५ पुगेको छ भने १६ जना निको भएर घर फर्किसकेका छन् ।