">
- अर्थ सरोकार सम्बाददाता
रौतहट । क्वारेन्टाइन स्थल अव्यवस्थित भएको भन्दै रौतहटको गौरमा रहेको जुद्ध उच्च माध्यमिक विद्यालय क्वारेन्टाइनमा बसेकाहरुले नाराबाजी गरेका छन् । खानाको राम्रो प्रवन्ध नभएको भन्दै क्वारेन्टाइनमा बसेकाहरुले आफूहरु घर जान पाउनु पर्ने भन्दै नाराबाजी र होहल्ला गर्न थालेपछि सो स्थान तनावग्रस्त बनेको थियो । विवाद उत्पन्न भएपछि जिल्ला प्रहरी कार्यालय रौतहटबाट थप प्रहरी परिचालन गरिएको र अहिले त्यहाँको परिस्थिति सामान्य रहेको जिल्ला प्रहरी कार्यालय रौतहटका डीएसपी भरत श्रेष्ठले बताए ।
क्वारेन्टाइनमा बसेका व्यक्तिहरुले घरबाटै खाना मगाउने, बाहिर पसलबाट सामान किनेर ल्याउन लगाउने लगायतका गतिविधि गरेपछि विवाद सिर्जना भएको हो । सडकमा ठेलामा फलफूल बेच्नेहरुसँग उनीहरुले क्वारेन्टिन कक्षबाटै सामान मगाउने गरेका छन् । घरबाट खाना लिएर जाने व्यक्तिहरुले क्वारेन्टिनभित्र नै गएर सामान दिन पाउनु पर्ने माग गर्दै विवाद सिर्जना गरेका थिए ।
क्वारेन्टाइन स्थलमा खटेका सुरक्षाकर्मीलाई अटेर गर्दै खाना पुर्याउनभित्र पुगेका उनीहरुले आफन्तसँग भेटघाट गर्न खोजेका थिए । हाल रौतहटमा विभिन्न १६ नगरपालिका र २ गाँउपालिकाहरुले निर्माण गरेको ३८ क्वारेन्टिनमा ४ हजार १३६ जना बसेका छन । गौरको नर्सिङ्ग इन्सटिच्युट र राजपुरको प्राथमिकक स्वास्थ्य केन्द्रमा निर्माण गरिएको आइसोलेसनमा ६७ जना उपचाररत छन ।
