• अर्थ सरोकार सम्बाददाता 

विरगञ्ज । कोरोनामुक्त भएका रौतहटको ईशनाथ नगरपालिकाका १९ वर्षीय युवकको स्वास्थ्यमा पुन: समस्या आएको छ ।  नारायणी अस्पतालबाट डिस्चार्ज भएका उनलाई पुनः स्वास्थ्यमा समस्या आएपछि पुनः  विरगञ्जस्थित नारायणी अस्पतालमै ल्याइएको छ ।

उक्त अस्पतालबाट वीरगञ्जका तीन जना र रौतहटका ती युवक कोरोनामुक्त भएको भन्दै एक साता अघि डिस्चार्ज भएका थिए । १९ वर्षीय ती युवकमा वैशाख १ गते कोरोना संक्रमण पुष्टि भएको थियो । वैशाख १४ गते अस्पतालबाट डिस्चार्ज भएका थिए ।

स्वास्थ्यमा समस्या देखिएपछि शनिबार बेलुका उनलाई लिन स्वास्थ्यकर्मीको टोली रौतहट गएको थियो । बुधबार अस्पतालबाट गएको टोलीले ती युवकको स्वास्थ्य जाँच गर्नुको साथै रगत र थ्रोट स्वाबको नमुना संकलन गरेर ल्याएको थियो । त्यसको रिपोर्ट शंकास्पद देखिएको बताइएको छ । ती युवकलाई नारायणी अस्पतालको आइसोलेसन वार्डमा राखिएको छ ।