• अर्थ सरोकार सम्बाददाता 

काठमाडौँ – साना किसान विकास लघुवित्त वित्तीय संस्था लिमिटेडको तेश्रो त्रैमासको वित्तीय विवरण सार्वजनिक गरेको छ । सार्वजनिक गरेको विवरण अनुसार बैंकले ४३ करोड ५० लाख रुपैयाँ खुद नाफा कमाएको छ । यो नाफा गत वर्षको सोहि अवधिको तुलनामा २५.७५% धेरै हो । गत वर्ष संस्थाले सोहि अवधिमा ३४ करोड ५९ लाख रुपैयाँ खुद नाफा कमाएको थियो । 

संस्थाको खुद ब्याज आम्दानी र सञ्चालन मुनाफा पनि बढेको छ । संस्थाको खुद ब्याज आम्दानी १४ करोड ९ लाख रुपैयाँ बढेर ७९ करोड ५० लाख पुगेको छ भने सञ्चालन मुनाफा ११ करोड १७ लाख रुपैयाँ बढेर ६५ करोड ५० लाख पुगेको छ । खुद ब्याज आम्दानी र सञ्चालन नाफा बढेकोले संस्थाको खुद नाफा पनि बढेको देखिन्छ। 

हाल संस्थाको चुक्ता पूँजी १ अर्ब रहेको छ भने जगेडा कोषमा १ अर्ब ८६ करोड रुपैयाँ रहेको छ । लघुवित्तले चैत मसान्तसम्ममा १९ अर्ब ७९ करोड सापटीबाट २२ अर्ब १२ करोड रुपैयाँ कर्जा प्रवाह गरेको छ ।

गत आवको चैत मसान्तमा ०.१६ प्रतिशत रहेको निष्क्रिय कर्जा चालु आवको सोही अवधिमा बढेर ०.६५ प्रतिशत पुगेको छ। यससँगै लघुवित्तले सम्भावित जोखिम बापतको व्यवस्थामा ५ करोड ६० लाख रुपैयाँ छुट्याएको छ। लघुवित्तले सो अवधिसम्ममा २ करोड ८६ लाख रुपैयाँ खराब कर्जा उठाउन सफल भएको छ।

सो अवधिसम्ममा लघुवित्तको प्रतिशेयर आम्दानी ५८ रुपैयाँ रहेको छ भने प्रतिशेयर नेटवर्थ २८६ रुपैयाँ १० पैसा रहेको छ। लघुवित्तको मूल्य आम्दानी अनुपात १७.०७ गुणा कायम भएको छ।