">
- अर्थ सरोकार सम्बाददाता
काठमाडौँ । भारतमा कोरोना संक्रमित १ लाख ५८ हजार नाघेको छ । स्वास्थ्य तथा परिवार कल्याण मन्त्रालयले बिहिबार बिहान दिएको जानकारी अनुसार भारतमा बुधबार एकै दिनमा ६ हजार ५६६ जना नयाँ कोरोना संक्रमित थपिएसंगै संक्रमित संख्या १ लाख ५८ हजार ३३३ पुगेको छ ।
मन्त्रालय तथ्याङ्कअनुसार भारतमा कोरोनाबाट ज्यान जानेको संख्या ४ हजार ५३१ जना पुगेको छ । यस संक्रमणबाट निको भएका बिरामीको संख्या ६७ हजार ९९२ जना रहेको पनि सो मन्त्रालयले जानकारी दिएको छ । हाल भारतमा ८६ हजार ११० जना कोरोना संक्रमित उपचाररत रहेका छन् ।
भारतमा कोरोना संक्रमणबाट सबै भन्दा प्रभावित राज्य महाराष्ट्र रहेको छ । यस राज्यमा मात्र ५६ हजार ९४८ नागरिक कोरोना संक्रमित रहेका छन् । महाराष्ट्रपछि तमिलनाडूमा दोस्रो स्थानमा रहेको छ । त्यहाँ १८ हजार ५४५ जनामा कोरोना भाइरसको संक्रमण रहेका छन् । गुजरातमा १५ हजार १९५ संक्रमति रहेका छन् । दिल्लीमा १५ हजार २५७ जना कोरोना संक्रमित रहेका छन् ।
भारतमा दुई महिना भन्दा बढी समयदेखि कोरोना भाइरस संक्रमण फैलिने डरले लकडाउन जारी रहेको छ । कोरोना भाइरसको संक्रमण क्रम नरोकिएपछि भारत सरकारले देशव्यापी रुपमा गरेको लकडाउनलाई मे ३१ सम्म जारी रहने घोषणा गरेको छ ।
