• अर्थ सरोकार सम्बाददाता 

वीरगञ्ज – कोरोना भाइरसबाट बढी प्रभावित बनेका स्थानहरु वीरगञ्ज, नेपालगन्ज र उदयपुरमा थप दुई हजार ५ सय व्यक्तिहरुको कोरोना परीक्षण गरिने भएको छ। स्वास्थ्य तथा जनसंख्या मन्त्रालयका अनुसार ‘हटस्पट’(कोरोना संक्रमण बढी) देखिएका तीन जिल्ला उदयपुर,वीरगञ्ज र नेपालगन्‍जमा नमुना संकलन गर्न काठमाडौंबाट इपिडिमियोलोजी तथा रोग नियन्त्रण महाशाखाको नेतृत्वमा र नेपाली सेनाको टिमले नमुना संकलन गरिरहेको छ ।

मन्त्रालयका अनुसार वीरगञ्ज र नेपालगन्जमा एक-एक हजार र उदयपुरमा ५ सय गरेर कुल २५ सय व्यक्तिको नमूना संकलन गरिनेछ । पछिल्लो समय संक्रमितको संख्या बढेसँगै यी तीन ठाउँलाई हटस्पटको रुपमा हेरिएको छ । जसमा नेपालगन्ज र वीरगञ्जमा २३ र उदयपुरमा २८ संक्रमित छन्। बुधबार मात्र वीरगञ्जमा एकै परिवारका १७ जना सदस्यमा संक्रमण देखिएको थियो। उनीहरूको नारायणी अस्पतालमा उपचार भइरहेको छ।