">
- अर्थ सरोकार सम्बाददाता
वीरगञ्ज । अख्तियार दुरुपयोग अनुसन्धान आयोगले पर्सामा कार्यारत एक जना प्रहरी सहायक निरीक्षक (असई) सहित ५ जनाविरुद्ध विशेष अदालत काठमाडौंमा मुद्दा दायर गरेको छ । आयोगले वीरगञ्ज महानगरपालिका अन्तर्गत पर्ने अस्थाई प्रहरी पोष्ट इनर्वागाउँका तत्कालिन असई पूर्णबहादुर तामाङ, हवल्दार विष्णु दयाल चौधरी, जवानद्वय अवधेश राय, राजकुमार गुरुङ र कावासोतीका सोनाम तामाङविरुद्ध मुद्धा दायर गरेको छ ।
अनुसन्धानको क्रममा उनीहरुले घुस लिएको पुष्टि भएपछि मुद्दा दर्ता गरिएको आयोगका प्रवक्ता प्रदीप कुमार कोइरालाले बताए । असई तामाङ, प्रहरी हवल्दार विष्णु दयाल र लागूऔषध नियन्त्रण व्यूरो शाखा पर्साका प्रहरी जवान रायले अर्का प्रहरी जवान गुरुङसँग मिलेर अपरिचित हुण्डी कारोबारीबाट बरामद भएको अवैध २० लाख रुपैयाँबाट ७ लाख एकआपसमा बाँडीचुडी घुस लिएको दाबी अख्तियारको छ ।
अख्तियारले असई तामाङ, विष्णु दयाल, राय र गुरुङलाई भ्रष्टाचार निवारण ऐन अनुसार घुस लिएको आरोपमा ७ लाख बिगो कायम गरेको छ ।
