">
- अर्थ सरोकार सम्बाददाता
काठमाडौं । राष्ट्रियसभाले प्रतिनिधिसभाबाट सन्देशसहित प्राप्त ‘विनियोजन विधेयक, २०७७ माथि विचार गरियोस’ भन्ने प्रस्तावलाई बहुमतले स्वीकृत गरेको छ । राष्ट्रियसभाको बिहीबारको बैठकमा अर्थमन्त्री डा. युवराज खतिवडाले प्रस्ताव गर्नुभएको विधेयकमाथि सैद्धान्तिक छलफल सकिएपछि बहुमतले स्वीकृत गरेको हो । सैद्धान्तिक छलफलका क्रममा सांसदहरुले उठाएका प्रश्नहरुको जवाफ दिदै अर्थमन्त्री खतिवडाले मुलुकको सन्तुलित विकासको लागि कुनै खास क्षेत्रलाई मात्रै चलायमान गराएर नहुने बताए । उनले समग्रतामा सबै क्षेत्रलाई एकसाथ अगाडि बढाउँदै लैजानुपर्ने बताए ।
कोरोनाको रोकथाम, नियन्त्रण र उपचार सरकारको पहिलो प्राथमिकता भएको र आर्थिक क्रियाकलापलाई दोस्रो प्राथमिकतामा राखेर बजेट ल्याइएको अर्थमन्त्री खतिवडाले स्पष्ट परे । ‘कोरोनाको रोकथाम, नियन्त्रण, उपचार हाम्रो पहिलो प्राथमिकता हो । जीवन रक्षा गर्नु पहिलो प्राथमिकता हो । जीवन रक्षा गर्दै आर्थिक क्रियाकलापलाई सामान्य गतिमा फर्काउने दोस्रो जिम्मेवारी हो । त्यो क्रममा राहत, पुनरउत्थान, राजेगारीका कुराहरु त्यसै भित्र पर्छन । त्यहि बाटोमा त्यहि क्षेत्रहरुमा मात्रै बजेट वृद्धि गरिएको छ । अरु बाँकी सबै क्षेत्रमा बजेट कटौति गरिएको छ । अंकले नै त्यो बताइ सकेका छन् ।’ उनले भने ।
कोरोना भाइरस नियन्त्रण गर्न सरकार असफल भएको भन्दै सरकारको विकल्प खोज्नुपर्ने सांसदहरुले बताएपछि अर्थमन्त्री खतिवडाले कसैले पनि कोरोना भाइरसको महामारीलाई अवसरको रुपमा लिन नहुने बताए । उनले कोरोना रोकथामका लागि भएको खर्च विवरण पारदर्शी रुपमा सरकारले सार्वजनिक गर्ने समेत बताए । प्रतिनिधि सभाबाट सन्देश सहित प्राप्त विनियोजन विधेयक २०७७मा विभिन्न मन्त्रालयगत शीर्षकमाथि छलफल गर्न र सम्बन्धित मन्त्रीले जवाफ दिनका लागि असार १ देखि ४ गते सम्मको समय तोकिएको छ । हेर्नुहोस् भिडियो :
