• अर्थ सरोकार सम्बाददाता 

धनगढी । सुदूरपश्चिममा थप २७ जनामा कोरोना संक्रमण पुष्टी भएको छ । बिहीबार धनगढीस्थित प्रयोगशालामा गरिएको परीक्षणमा प्रदेशमा चार दिने शिशुसहित थप २७ जनामा कोरोना संक्रमण देखिएको हो । 

धनगढीस्थित सेती प्रादेशिक अस्पतालका अनुसार बाजुराको बुढीगंगा नगरपालिकामा चार दिनको शिशुसहित नौ जना पुरुष र आठ जना महिला तथा त्रिवेणी नगरपालिकामा एक जना पुरुषमा कोरोना संक्रमण भएको पुष्टी भएको हो । योसँगै बाजुरामा संक्रमितको संख्या २१ पुगेको छ । यसअघि बाजुरामा दुई वर्षीया बालिकाको कोरोनाका कारण मृत्यु भइसकेको छ ।

यस्तै कैलालीमा सात, बझाङमा दुई जनामा पनि कोरोना संक्रमण देखिएको सेती अस्पतालले जनाएको छ । योसँगै सुदूरपश्चिममा संक्रमिटको संख्या एक सय ९१ पुगेको छ ।