- अर्थ सरोकार सम्बाददाता
काठमाडौँ । झन्डै साढे दुई महिनाको निरन्तर लकडाउनले व्यवसाय चौपट भएको भन्दै बौद्धका ब्यापारीले पसल खोलेका छन् । बौद्धका ब्यापारीले व्यवसाय चौपट भएको भन्दै मंगलबार बिहान पसल खोलेका हुन् । व्यापारी हुल बाँधिएर आएर पसल खोलेपछि बौद्धमा केही समय अवस्था असहज बनेको थियो । व्यापारी धमाधम पसल खोल्न थालेपछि प्रहरीले हस्तक्षेप गरेको थियो ।
सरकारले जेठ ३२ सम्म लकडाउन लम्ब्याएपछि सरकारको निर्णयको विरोध भइरहेको छ । लकडाउनको मोडालिटी परिवर्तन गर्न र जनजिवनलाई सामान्यतर्फ फर्काउन सरकारमाथी दबाब परिरहेको छ । सरकारले कोरोना भाइरस संक्रमणको नियन्त्रण तथा रोकथामका लागि चैत ११ गतेदेखि लकडाउन गरिरहेको छ । पछिल्लो समय कलकारखाना खोलिएपनि अन्य भने ठप्पै छन् ।
