• अर्थ सरोकार सम्बाददाता 

काठमाडौँ । हुन त यो देशमा एकमात्र त्यस्तो शपिङ मल जसलाई कसैले पनि छुन सक्दैन, त्यो हो भाटभटेनी । देशमा पूर्ण लकडाउन हुँदा पनि रक्सी बेच्नसमेत नछोडेको यो सुपरस्टोरलाई कोरोनाका बेला रुघा लागेका कर्मचारी राख्दासमेत कसैले कारवाही गर्न सकेन । बर्षौं भयो विभिन्न कुरामा भाटभटेनी पटक-पटक विवादमा आएको । तर अहँ स्थानीय प्रशासनको दम छैन भाटभटेनीलाई कारवाही गर्न ।

यस्तै पावरको दुरुपयोग गरेर लकडाउनपछि खल्ती रित्तिएका ग्राहकहरुलाई झन् ठग्न थालेको छ भाटभटेनीले। ‘लकडाउनभन्दा २ दिन अघिमात्र ७०० रुपैयाँमा किनेको त्यहि समान अहिले नयाँ स्टिकर राखेर ९९५ रुपैयाँमा बेच्न थालिएको छ । सामान त्यहि हो, जुन मैले लकडाउनको २ दिन अघि किनेको थिएँ, र स्टक पनि त्यहि रहेछ । तर लकडाउनका बेला ग्राहकहरुसँग पैसा नभएका बेला स्टोरले ठग्न थालेको छ ।’ भक्तपुरका समिर श्रेष्ठले अर्थ सरोकार डटकमसँग गुनासो पोखेका छन् ।

पूरानो समानलाई नयाँ भनेर बेचिएकोसमेत उनको गुनासो छ । ‘पूरानो स्टिकरमाथि नयाँ स्टिकर राखिएको छ । जुन प्रष्ट देख्न सकिन्छ ।’ भाटभटेनीबाट ठगिएका ग्राहक श्रेष्ठ भन्छन्, ‘यस्तो महामारीका बेला पनि अनेक जुक्ति लगाएर जनता ठग्नेलाई किन कारवाही हुँदैन ?’