- अर्थ सरोकार सम्बाददाता
काठमाडौं । अख्तियार दुरुपयोग अनुसन्धान आयोगले खानेपानी तथा ढल व्यवस्थापन विभागका सिनियर डिभिजन इन्जिनियर राजकुमार शाक्यविरुद्ध विशेष अदालतमा मुद्धा दायर गरेको छ । आयोगले शाक्यले १० करोड ७७ लाख ५० हजार ४ सय ५३ रुपैयाँ अवैध आर्जन गरेको भन्दै विशेष अदालतमा मुद्धा दायर गरेको हो ।
२०४९ जेठ २ गते जिल्ला खानेपानी कार्यालय कञ्चनपुरमा ओभरसियर पदमा सरकारी सेवा प्रवेश गरेका शाक्यले २०७६ फागुन मसान्तसम्म १२ करोड ३९ लाख २४ हजार १४ रुपैयाँ आम्दानी गरेको अख्तियारको दाबी छ । यस अवधिमा उनको वैध आम्दानी १ करोड ६१ लाख ७३ हजार ५ सय ६१ रुपैयाँ मात्र हुने अख्तियारको भनाई छ ।
शाक्यले आफू र श्रीमतीको नाममा जग्गा खरिद, घर निर्माण र सवारी साधन खरिद गर्नुका साथै भान्जी नाता पर्ने व्यक्तिको नाममा समेत जग्गा किनेर लुकाएको पाइएको अख्तियारले जनाएको छ । शक्यले आफू र परिवारका सदस्यको नाममा मुद्धति खातामा रकम जम्मा पारेको र मुद्धति निक्षेप परिपक्व नहुँदै त्यसलाई धितो राखेर ऋण लिएको पाइएको अख्तियारले जनाएको छ ।
शाक्यविरुद्ध भ्रष्टाचार निवारण ऐन, २०५९ को दफा २० को उपदफा ९२० र दफा १६ को उपदफा ९२० बमोजिमसमेतको सजाय गरी गैरकानूनी आर्जन गरेको १० करोड ७७ लाख ५० हजार ४ सय ५३ रुपैयाँ विगो असुल गर्न अख्तियारले माग गरेको छ ।
