- अर्थ सरोकार सम्बाददाता
काठमाडौं । सरकारले निजी क्षेत्रका प्रयोगशालाहरूलाई पनि कोरोना भाइरसको परीक्षण गर्न दिने भएको छ। सरकारी प्रयोगशालाले परीक्षणको चाप धान्न नसकेपछि सरकारले निजी प्रयोगशालालाई पनि परीक्षण गर्न दिने निर्णय गरेको हो । राष्ट्रिय जनस्वास्थ्य प्रयोगशालाले इच्छुक निजी क्षेत्रका प्रयोगशालाहरूलाई आफ्नो परीक्षण क्षमतासहितको विवरण पेस गर्न आव्हान गरेको प्रयोगशालाकी निर्देशक डा. रूना झाले बताइन् ।
‘हामीले निजीलाई पनि दिने निर्णय गरेका हौं । ईच्छुकहरुलाई उहाँहरूको क्षमता, जनशक्ति र मूल्य निर्धारणको विवरण पेस छौं । त्यसपछी उहाँहरुको सबैकुरा बुझेर हामी अगाडि बढ्नेछौं । उहाँहरुले त्यति धेरै त गर्न सक्नुहुन्न तर केही हदसम्म सहयोग हुने हुनाले हामीले यो निर्णय गरेका हौं ।’ उनले भनिन् ।
यस बारेमा हिजोबाट छलफल सुरु भएको र अब आईतबारसम्ममा निश्कर्ष निस्कने स्वास्थ्य मन्त्रालयका स्वास्थ्य विज्ञ खेम कार्कीले बताए । त्यसपछि कस्तो अस्पताललाई दिने भन्ने निणर्य हुने उनले बताए । अहिले देशभर रहेका २० वटा प्रयोगशालाहरूले परीक्षण गरिरहेका छन् । उनीहरूले पछिल्लो समय परीक्षण धान्न नसक्दा प्रयोगशालाहरूमा नमूनाको चाङ लागेको छ।
