">
काठमाडौं । भारतमा कोरोना संक्रमणबाट ज्यान गुमाउनेको संख्या ११ हजार नाघेको छ । भारतको स्वास्थ्य मन्त्रालयको तथ्यांकअनुसार पछिल्लो २४ घण्टामा भारतमा कोरोना भाइरसबाट दुई हजार तीन जनाको मृत्यु भएसंगै ज्यान गुमाउनेको संख्या ११ हजार ९०३ पुगेको छ । साथै, पछिल्लो २४ घण्टामा भारतमा संक्रमित १० हजार ९७४ नयाँ थपिएसंगै संक्रमित संख्या तीन लाख ५४ हजार ६५ पुगेको छ । अहिलेसम्म भारतमा कोरोना भाइरसका एक लाख ८६ हजार ९३५ संक्रमित निको भएर घर फर्किसकेका छन् ।
भारतमा अहिलेसम्म सबैभन्दा प्रभावित राज्य महाराष्ट्र रहेको छ । महाराष्ट्रमा अहिलेसम्म कोरोना संक्रमित एक लाख १३ हजार ४४५ फेला परेका छन् भने पाँच हजार ५३७ जनाको कोरोनाको कारण मृत्यु भइसकेको छ ।
त्यस्तै तामिलनाडुमा अहिलेसम्म ४८ हजार १९ संक्रमित फेला परेका छन् भने ५२८ जनाको मृत्यु भइसकेको छ । दिल्लीमा ४४ हजार ६८८ संक्रमित भेटिँदा एक हजार ८३७ को मृत्यु भइसकेको छ । गुजरातमा २४ हजार ५७७ संक्रमित फेला परिसकेका छन् भने एक हजार ५३३ जनाको मृत्यु भइसकेको छ ।
त्यस्तै उत्तर प्रदेशमा अहिलेसम्म १४ हजार ९१ संक्रमित फेला परेका छन् भने ४१७ जनाको मृत्यु भएको छ । पश्चिम बंगालमा ११ हजार ९०९ संक्रमित भेटिएका छन् भने ४९५ जनाको मृत्यु भइसकेको छ । बिहारमा ६ हजार ७७८ संक्रमित फेला परेका छन् भने ४१ जनाको मृत्यु भइसकेको छ। – एजेन्सी
