- अर्थ सरोकार सम्बाददाता
काठमाडौं । विश्वभर कोरोनाबाट मृत्यु हुनेको संख्या पाँच लाख नाघेको छ । जोन्स हप्किन्स युनिभर्सिटीको तथ्यांक अनुसार अहिलेसम्म विश्वभर कोरोना भाइरसको कारण मृत्यु हुनेको संख्या पाँच लाख चार हजार ४६६ पुगेको हो । करिब ६ महिनाअघि चीनको वुहानबाट सुरु भएको नोभेल कोरोना भाइरस संक्रमितको संख्या विश्वभर एक करोड २ लाख ४९ हजार ४६० पुगेको छ ।
अमेरिकामा अहिलेसम्म एक लाख २८ हजार ४३७ जनाको मृत्यु भइसकेको छ भने ब्राजिलमा पनि मृत्यु हुनेको संख्या ५७ हजार ६५८ पुगेको छ । बेलायतमा पनि ४३ हजार ५५० जनाको मृत्यु भइसकेको छ । इटालीमा पनि मृत्यु हुनेको संख्या ३४ हजार ७३८ पुगेको छ । फ्रान्समा पनि कोरोना भाइरसबाट मृत्यु हुनेको संख्या २९ हजार ७७८ पुगेको छ । यस्तै भारतमा कोरोनाबाट मृत्यु हुनेको संख्या १६ हजार चार सय ८७ पुगेको छ। नेपालमा अहिलेसम्म कोरोनाबाट २८ जनाको मृत्यु भइसकेको छ।
