• अर्थ सरोकार सम्बाददाता 

काठमाडौं । कर्णाली प्रदेशमा कोरोना संक्रमित संख्या ७६३ पुगेको छ । बिहीबार थप ५५ जनामा कोरोना संक्रमण पुष्टि भएसँगै कर्णालीमा कोरोना संक्रमित हुनेको संख्या ७६३ पुगेको हो । 

कर्णाली प्रदेश अस्पताल तथा पशुपक्षी रोग अन्वेषण प्रयोगशाला सुर्खेतमा गरिएको पिसिआर परीक्षणमा दैलेखका ४८, सुर्खेतका ६ र काठमाडौँ बूढानीलकण्ठ निवासी हाल चिङ्गाड गाउँपालिका सुर्खेतमा बस्दै आएका एक जनामा कोरोना संक्रमण पुष्टि भएको हो ।

कर्णाली प्रदेश सामाजिक विकास मन्त्रालय स्वास्थ्य सेवा महाशाखाका प्रमुख डा लक्ष्मीनारायण तिवारीले दैलेख डुङ्गेश्वर गाउँपालिकामा ६ महिने शिशु, चार महिलासहित ३९, वडाभैरव, खोर, खगेना, रुम, तुम्लुङ, तुर्सुका नौ जनामा संक्रमण पुष्टि भएको छ । त्यस्तै सुर्खेत चिङ्गाड गाउँपालिकाका ६  जनामा कोरोना संक्रमण पुष्टि भएको स्वास्थ्य सेवा महाशाखाले जनाएको छ ।