• अर्थ सरोकार सम्बाददाता 

काठमाडौं । भारतबाट नेपाल आउँदै गरेको नवलपरासीका एक युवकको रुपन्देहीको सीमा बेलहियानजिकै आइपुग्दा बुधबार बिहान मृत्यु भएको छ । भारतको मुम्बईमा मजदुरी गर्दै आएका पश्चिम नवलपरासीको सुस्ता गाउँपालिका वडा नम्बर २ का अन्दाजी ३२ वर्षीय युवकको मृत्यु भएको हो । पश्चिम नवलपरासीका प्रमुख जिल्ला अधिकारी सागरमणि पाठकले ती युवकको शव ल्याउन जिल्ला प्रशासन कार्यालय रुपन्देहीसँग समनवय गरिरहेको बताए । 

रुपन्देही प्रशासनले भने भारतीय भूमिमै ती युवकको मृत्यु भएकोले त्यहीँ पिसिआर परीक्षण गरेपछि मात्र शव व्यवस्थापनको प्रक्रिया अगाडि बढाइने जनाएको छ। पिसिआर परीक्षणमा कोरोना पोजेटिभ आए भारतमै शव व्यवस्थापन गरिने र नेगेटिभ आएमात्र शवलाई नेपाल ल्याएर परिवारको जिम्मा लगाइने रुपन्देही प्रशासनले जनाएको छ । ती युवक सीमानजिक आइपुगेपछि अचानक बेहोस् भएका थिए । बेहोस भएको केही क्षणमै उनको ज्यान गएको छ । ती युवकमा अन्य स्वास्थ्य समस्या रहेको परिवारस्रोतबाट जानकारी प्राप्त भएको प्रजिअ पाठक बताउँछन् ।