">
- अर्थ सरोकारा सम्बाददाता
गुल्मी । गुल्मी धुर्कोट गाउँपालिका अध्यक्ष भुपाल पोख्रेलले कोरोना जितेका छन् । जेठ १२ गते कोरोना पुष्टि भएसंगै एकान्तबास बस्दै आएका पोखरेलले १२ दिनमा कोरोना जितेका हुन् । उनले घरमै बसी कोरोना जितेपछि कोरोना पोजेटिभ देखिदैमा सबैजनालाई आइसोलेसन र अस्पताल आवश्यक नपर्ने सन्देश दिएका छन् ।
कोरोना देखिएपछि सार्वधिक चासो र चर्चामा रहेका पोख्रेलले अन्तत १२ दिनमा कोरोना जितेका छन् । शनिबार सहित दुई पटक उनको पिसिआर रिपोर्ट नेगेटिभ आएको जिल्ला स्वास्थ्य कार्यालय गुल्मीका प्रमुख डाक्टर भवानी शर्माले बताए । तातोपानी, नुन, बेसार, गुर्जो जस्ता गाउँघरे औषधी मात्रै आफुले खाएको अध्यक्ष पोखरेलले बताए । कोरोना घरमै बसेर जित्न सकिने आफुले अनुभव गरेको उनको भनाई छ । अस्पतालमा १५ दिनमा ठिक हुनेमा घरमा बस्दा १० दिनमै निको हुने उनले बताए ।
घरमा बस्दा घरपरिवार र समाजले नै मनोबल बढाइदिने उनको तर्क छ । घरमा सन्तुलित खाना र सरसफाई हुने हुदा पनि कोरोना लाग्दैमा सबैजना आइसोलेसनमा जानै पर्ने आफुले नदेखेको उनले बताए । गुल्मीमा पाँच जनामा कोरोना पुष्टि भएको छ । अध्यक्ष पोख्रेल सहित गुल्मीमा दुई जनाले कोरोनालाई जितेका छन भने दुई जनाको उपचार भइरहेको छ । गुल्मीका एक जनाको कोरोनाका कारण निधन भएको छ ।
