- अर्थ सरोकार सम्बाददाता
काठमाडौं । विदेशमा अलपत्र नेपालीको उद्दार सुरु गरेको सरकारले काठमाडौँ ल्याएर पाँच स्थानमा क्वारेन्टाइन बनाएर राख्ने भएको छ । सरकारले काठमाडौँ उपत्यका बाहिरका पाँच स्थानमा साढे १६ हजार कोठा तयार पारेको जनाएको छ । विदेशमा आउनेहरुले आफ्नो खर्चमा होटलमा बस्न चाहे सरकारले तोकेको पाँच स्थानका होटलहरुमा तोकिएको शुल्क तिरेर बस्नुपर्नेछ । आफैँ खर्च ब्यहोर्न नसक्नेहरुका लागि भने सरकारले नै खाना बस्नको प्रवन्ध गर्ने भएको छ ।
सरकारले होटलमा बस्न चाहनेहरुका लागि नगरकोट, धुलिखेल, पोखरा, चितवन र भैरहवाका होटलमा श-शुल्क क्वारेन्टाइनको प्रवन्ध मिलाएको हो । होटेल संघ नेपाल (हान)का अनुसार पोखरामा ३ हजार, चीतवनमा ५ हजार ५ सय, भैरहवामा ४ हजार र धुलिखेल र नगरकोटमा गरी ४ हजार कोठामा क्वारेन्टाइनको व्यवस्था मिलाइएको छ । यी होटलहरु पर्यटक स्तरदेखि चार तारेसम्मका छन् । जहाँ एक जनाको ३ हजार देखी ८ हजारसम्म र डबल रुमको २ हजारदेखी ५ हजार ५ सयसम्म शुल्क लाग्नेछ ।
