कैलाली । कैलालीको सेती अञ्चल अस्पताल र टीकापुर अस्पतालमा रहेका आइसोलेसन वार्ड भरिएपछि बिरामी राख्न समस्या भएको छ । आइसोलेसन वार्ड भरिएपछि थप सङ्क्रमित राख्न समस्या भएको अस्पतालले जनाएको छ। कैलालीका यी दुबै अस्पतालमा रहेका आइसोलेसन वार्डमा सङ्क्रमित बिरामी भरिएपछि समस्या भएको छ । मङ्गलबार कैलालीका १० जनामा कोरोना पुष्टि भएपछि सङ्क्रमितलाई राख्न आइसोलेसन वार्डमा शैया अभाव भएको सेती अञ्चल अस्पतालले जनाएको छ।
सेती प्रादेशिक अस्पतालसँग २४ शैया र टीकापुर अस्पतालमा १२ शैयाको आइसोलेसन वार्ड छ। सेतीमा बिरामीको सङ्ख्या २५ पुगिसकेको छ। अझै गौरीगङ्गाका पाँच सङ्क्रमितलाई पनि सेती अस्पताल लैजाने तयारी भएको छ । अस्पतालका मेडिकल सुपरिटेन्डेन्ट डा. हेमराज पाण्डेले शैया अभाव भएकाले बिरामीलाई कहाँ राखेर उपचार गर्ने भन्ने समस्या भएको बताए । ‘सङ्क्रमित दैनिक थपिन थालेका छन्,’ पाण्डेले भने, ‘अब बिरामी कहाँ राखेर उपचार गर्ने भन्ने विकल्प खोजिनुपर्छ।’
टीकापुर अस्पतालमा १२ शैयाको आइसोलेसन वार्ड छ। यहाँ १३ जनाको उपचार भइरहेको छ। टीकापुरमा मङ्गलबार चार जनामा सङ्क्रमण देखिएपछि एक जनालाई शैया अभाव हुँदा अस्पतालका अन्य वार्डमा रहेको शैया प्रयोग गरेर बिरामी राख्नुपरेको अस्पतालले जनाएको छ । जिल्ला स्वास्थ्य कार्यालय कैलालीका प्रमुख लालबहादुर धामीले दुवै अस्पताल भरिएकाले अब अन्य ठाउँमा पनि विकल्प खोजी गरी बिरामी राख्ने व्यवस्था गर्न आवश्यक रहेको बताए। सेती अस्पतालमा ५० शैयाको कोरोना अस्पताल निर्माणपछि हस्तान्तरण भइसकेको छ तर उपकरण जडान बाँकी रहेकाले सञ्चालनमा आउन सकेको छैन ।
व्यवस्थापनमा खटेकाको पिसीआर परीक्षण
टीकापुरमा पहिलोपटक चार जनामा कोरोना सङ्क्रमण देखिएपछि कर्णाली मावि टीकापुरको क्वारेन्टिनमा रहेका सबैको पिसीआर परीक्षण गरिने भएको छ। क्वारेन्टिनमा रहेका ९९ र उनीहरुको व्यवस्थापनमा खटेका कर्मचारी र स्वास्थ्यकर्मीको स्वाब सङ्कलन गर्न थालिएको टीकापुर नगरपालिकाले जनाएको छ। टीकापुरका सङ्क्रमित चारै जना यही जेठ ९ गते भारतबाट आएर कर्णाली माविको क्वारेन्टिनमा बसेका थिए।
कर्णाली माविको क्वारेन्टिनमा ९९ जना बसिरहेका मध्येबाट ४२ को स्वाब सङ्कलन गरी परीक्षण गर्दा ३८ को रिर्पोट नेगेटिभ आएको र चार जनाको रिर्पोट पोजेटिभ आएको टीकापुर नगरपालिकाका स्वास्थ्य शाखा संयोजक बलबहादुर रावलले जानकारी दिए । ‘चार जनाको रिर्पोट पोजेटिभ आएपछि अब क्वारेन्टिनमा रहेका ९९ र उनीहरुको व्यवस्थापनमा खटेको स्वास्थ्यकर्मीलगायत कामदार सबैको आज पिसीआर परीक्षण गर्दैछौं,’ संयोजक रावलले भने, ‘मसहित उनीहरुको स्वास्थ्य परीक्षण र व्यवस्थापनमा खटेकाहरु पनि क्वारेन्टिनमा बसेका छौं ।’
टीकापुरमा ३० शैयाको अस्पताल निर्माणकार्य तीव्र
कैलालीको टीकापुरमा ३० शैयाको अस्थायी कोरोना अस्पतालको काम तीव्र पारिएको छ। टीकापुरको सिटीहलमा सञ्चालन हुने अस्थायी कोरोना अस्पतालमा बिजुली जोड्ने, पर्दा लगाउने र शैया व्यवस्थापनको काम भइसकेको छ। बाँकी काम चाँडै सम्पन्न गरेर अर्को सातादेखि सञ्चालनमा ल्याउने गरी काम भइरहेको टीकापुर अस्पतालका मेडिकल सुपरिटेन्डेन्ट डा जीतेन्द्र कँडेलले जानकारी दिए । ‘काम तीव्र रूपमा भइरहेको छ। शैया व्यवस्थापनको काम सकिएको छ,’ उनले भने, ‘सङ्क्रमित थपिँदै गएका छन्, हामी अर्को सातादेखि अस्पताल सञ्चालन गर्ने तयारीमा छौं।’
अस्थायी कोरोना अस्पतालमा चिकित्सक टीकापुर अस्पतालकै खट्नेछन् भने बाँकी अन्य स्वास्थ्यकर्मी कैलालीका पूर्वी क्षेत्रका सात स्थानीय तहले १५/१५ दिन पालैपालो खटाउने सहमति भएको डा कँडेल भन्छन् ( स्वास्थ्यकर्मी बस्ने क्वार्टर पनि तयार हुँदैछ। उनीहरू १५ दिन त्यही बसेर सेवा दिनेछन्, त्यसपछि अर्को पालिकाको पालो आउनेछ। यसरी गर्दा सजह पनि हुनेछ । कैलालीमा कोरोनाका सङ्क्रमित बढ्न थालेपछि कैलालीका सात स्थानीय तहले टीकापुरस्थित सिटीहलमा छुट्टै कोरोना अस्पताल सुरू गर्ने निर्णय गरेपछि काम थालिएको टीकापुर नगरपालिकाका प्रमुख तपेन्द्र रावलले बताए ।
‘यस्तो विपत्तिमा स्थानीय सरकार मिलेर विपत्तिको सामना गर्ने तयारी गरेका हौं,’ नगरप्रमुख रावलले भने, ‘लाग्ने खर्च पनि सात स्थानीय तह मिलेर व्यहोर्ने सहमति भएको छ।’ पछिल्लोपटक कैलालीबाट रोजगारी गर्न भारत गएका नागरिक घर फर्किने क्रम बढ्न थालेपछि कैलालीमा समेत सङ्क्रमित बढ्न थालेका छन् । -रासस
