काठमाडौँ । उपत्यकाका प्रमुख जिल्ला अधिकारीहरूले लकडाउन खुकुलो बनाउन सरकारलाई सिफारिस गर्ने भएका छन् । लकडाउन अवधिमै व्यापारीहरुले आफूखुसी पसल खोल्न थालेपछि यस्तो गर्न लगिएको हो । 

व्यापारीहरूले न्युरोडलगायत ठाउँमा पसल खोलेपछि बिहीबार आकस्मिक रूपमा काठमाडौं, भक्तपुर र ललितपुरका प्रजिअको बैठक बसेको हो । बैठक काठमाडौंका प्रजिअ जनकराज दाहालको अगुवाइमा बसेको हो । अहिले पनि बैठक जारी रहेको भक्तपुरकी प्रजिअ हुमकला पाण्डेले बताइन् ।  

प्रजिअ पाण्डेले प्रजिअहरूको बैठकका निर्णय क्राइसिस म्यानेजमेन्ट सेन्टर (सिसिएमसी) लाई जानकारी दिइने बताइन्। यता लकडाउनबारे आजै अपरान्ह ४ बजे मन्त्रिपरिषद बैठकमा पनि छलफल हुँदैछ ।