• अर्थ सरोकार सम्बाददाता 

काठमाडौं । भारतीय ट्रान्पोर्टर र क्लयेरिङ एजेन्टले काम बन्द गर्ने घोषणा गरेका छन् । भारतको सुनौली भन्सारलाई केन्द्र नबाएर काम गर्ने भारतीय ट्रान्पोर्टर र क्लयेरिङ एजेन्टले काम बन्द गर्ने घोषणा गरेका हुन् । भन्सार क्लेयरिङ प्रक्रियाका लागि नेपालको भैरहवाको भन्सार कार्यालयमा आएर काम गर्न नदिईएको भन्दै उनीहरुले भन्सार जाँचपासको प्रक्रिया रोक्ने निर्णय गरेका हुन् । उक्त जानकारी उनीहरुले जिल्ला प्रशासन कार्यालय रुपन्देही र भैरहवा भन्सारलाई पनि दिएका छन् । 

भारतको सुनौली ट्रान्सर्पोट एन्ड क्लेयरिङ एसोसियसनले लेखेको पत्रमा भन्सार जाँचपास गर्न भैरहवा भन्सार कार्यालयसम्म आउन नपाउँदा अनेकन समस्या भएको उल्लेख छ । एजेन्टहरु नेपाल आउन नपाउँदा भारतबाट छुटेका गाडी नेपाली भन्सरमा २/३ दिन रोकिएको एसोसियसनको गुनासो छ । गाडीलाई भाडा दिन, नेपालमा भन्सार रजस्व जम्मा गर्न, नेपाल इन्टरमोडलको रसिद काट्न, भन्सारबाट गाडी निकाल्न र सामान जाँच गर्न धेरै समय लागेको संघले बताएको छ । यस्तो समस्या हल गर्न भारतबाट नेपालतर्फ आउन लाग्दा बेलहिया प्रहरीले रोकेकाले समस्या थपिएको एसोसियसनले पत्रमा उल्लेख गरेको छ ।