- अर्थ सरोकार सम्बाददाता
काठमाडौँ । काठमाडौँको मुटुमा धेरैको एक्लोपनको सारथी बन्ने थलो हो रत्नपार्क । यहि रत्नपार्क धेरैको समय बिताउने थलो हुने गरेको थियो भने धेरैको दु:ख बिसाउने चौतारी पनि । बेरोजगारले रोजगारीको कल्पना गर्ने थलो, रोजगार भएकाले यसो फुर्सदमा समय बिताउने थलो, केटाकेटिलाईरमाइलो गर्ने थलो, प्रेमी-प्रेमिकाले केहि सुमुधुर सपनाहरु बाँड्ने थलो । अरु केहि नभएपनि एक्लोपनमा रमाएर केहि सोच्ने थलो ।
रत्नपार्क धेरैका लागि धेरै कुरामा विशेष थियो, छ र रहनेछ सायद । तर कोरोनाको कहरले देश आक्रान्त बनेपछि अहिले रत्नपार्क एक्लो प्राय छ । उसमा काखमा ढुलमुलिएर सपना बाँड्नेहरु अहिले घरभित्र बन्द कोठामा छन् सायद । कोरोनाको त्रासले अहिले रत्नपार्कको सुन्दरतासँग मितेरी गाँस्न कोहि पनि आउन सकेका छैनन् । गुम्सिएको मनलाई शान्त बनाउने रत्नपार्क आज आफैं गुम्सिन बाध्य बनेको छ ।
