- अर्थ सरोकार सम्बाददाता
पोखरा । पश्चिमाञ्चल क्षेत्रीय अस्पतालमा उपचारका क्रममा आइतबार मृत्यु भएका स्याङ्जा फेदीखोला गाउँपालिका– ५१ वर्षीय खड्कबहादुर कार्कीको कोरोना भाइरस संक्रमणसम्बन्धी परीक्षण गर्दा रिपोर्ट नेगेटिभ आएको छ । उपचारका क्रममा पोखराको कोरोना विशेष अस्पतालमा मृत्यु भएपछि कोरोना परीक्षणका लागि उनको स्वाब संकलन गरिएको थियो ।
एक साताअघि भारतबाट आएर क्वारेन्टाइनमा बसेर घर फर्किएका कार्की अकस्मात् बिरामी भएपछि उनलाई उपचारका लागि पोखरा ल्याइएको थियो । क्वारेन्टाइन बसेर घर फर्किने क्रममा कोरोना परीक्षण गर्दा रिपोर्ट नेगेटिभ आएको थियो । उपचारका क्रममा कार्कीको मृत्यु भएपछि अस्पताल प्रशासनले पुनः कोरोना परीक्षणका लागि स्वाब संकलन गरी पोखरा स्वास्थ्य प्रतिष्ठानकाको प्रयोगशालामा परीक्षण गरेको थियो ।
