चितवन । कोरोना संक्रमणबाट मृत्यु भएका वृद्धको ज्वाईँ र उनीसँगै आइसियूमा रहेका बिरामीमा कोरोना रिपोर्ट नेगेटिभ आएको छ । मुटु, सुगर र उच्च रक्तचापसमेतका बिरामी रहेका भरतपुर महानगरपालिका वडा नं. ११ का वृद्धको मंगलबार बिहान भरतपुर अस्पतालको आइसियूमा मृत्यु भएको थियो ।

श्रीमतीसहित छोरी ज्वाईँको घरमा बसेका वृद्धलाई उपचारका लागि भरतपुरको नारायणी सामुदायिक अस्पताल लगेका ज्वाईँमा कोरोना संक्रमण नदेखिएको भरतपुर अस्पतालका सूचना अधिकारी लिलाधर पौडेलले जानकारी दिए । उनको अर्को साता फेरि स्वाब परीक्षण गरिनेछ । उनलाई अहिले आइसोलेसनमा राखिएको छ । 

अस्पतालका निर्देशक बिष्णु कुँवरका अनुसार ६ जना बिरामी र दुई स्वास्थ्यकर्मीको रिर्पोट नेगेटिभ आएको छ । बाँकी केही स्वास्थ्यकर्मी अहिले पनि होटलको क्वारेन्टाइनमा रहेको निर्देशक कुँवरले बताए ।