- दिपकराज भट्ट/अर्थ सरोकार सुदूरपश्चिम ब्युरो
डडेल्धुरा । खेतीबालीका लागि निकै खतरनाक मानिएको सलह कीरा डडेल्धुरामा पनि देखिएको छ । डडेल्धुराको परशुराम नगरपालिका–४, कटालमा कीरा देखिएको स्थानीयको भनाइ रहेको छ । किसानहरूले धेरै मात्रामा अनौठो फट्याङ्ग्रा आएको खबर दिएपछि स्थलगत अनुगमनमा जाँदा आफूले थोरै मात्रामा सलह देखेको नगरपालिकाको कृषि शाखाका प्राविधिक सहायक कालुसिंह बोहराले जानकारी दिए ।
किसानले खबर गरेपछि आफूहरू अनुगमनमा गएको र सोही क्रममा धान र मकैको खेतमा सलह देखेको बोहोराले बताए । ठूलो बथानबाट ती कीरा छुट्टिएर आएको हुन सक्ने उहाँको भनाई रहेको छ । यो किरा छिमेकि मुलुक भारत बाट आएको अनुमान गरिएको छ । ती कीराले बालीमा खासै नोक्सान नगरेको भएतापनि आफूहरूले कृषकलाई ठूलो आवाज गरेर सलह भगाउने सल्लाह दिएर आएको उनले जानकारी दिए ।
