• अर्थ सरोकार सम्बाददाता 

काठमाडौँ । अर्थमन्त्री डा. युवराज खतिवडाले नेपाल जस्तो कम आय भएको देशलाई भौतिक पूर्वाधार निर्माणका निम्ति एशियाली पूर्वाधार लगानी बैंक (एआइआइबी) लचिलो हुनुपर्ने बताएका छन् । चिनियाँ राष्ट्रपति सी चिनफिङद्वारा उद्घाटित बैंक सञ्चालक समूहको पाँचौ बैठकलाई मंगलबार अप्रत्यक्षरुपमा सम्बोधन गर्दै  मन्त्री खतिवडाले यस्तो बताएका हुन् ।

उनले एआइआइबीले अन्य अन्तर्राष्ट्रिय वित्तीय संस्थाहरुसँग साझेदारी गरी भौतिक पूर्वाधारमा दिगो लगानी गर्न तथा दिगो विकासका लक्ष्य हासिल गर्न सघाउनुपर्ने बताए । अतिकम कार्बन उत्सर्जन गर्ने नेपाललाई कोरोनाले आर्थिक क्षेत्रमा प्रभाव पारेकाले अर्थतन्त्रको पुनरुत्थान तथा स्वास्थ्य पूर्वाधारका लागि लगानी बढाउन अपरिहार्य भएको मन्त्री खतिवडाले बताए ।