• अर्थ सरोकार सम्बाददाता 

धनगढी । सुदूरपश्चिम प्रदेशमा बुधबार थप ५७ जनामा कोरोना संक्रमण पुष्टी भएको छ । धनगढीस्थित सेती प्रादेशिक अस्पतालको प्रयोगशालामा गरिएको परिक्षणमा १९ महिला र ३८ पुरुषमा संक्रमण पुष्टि भएको हो । पछिल्लो २४ घण्टामा परिक्षण गरिएका २ सय नमुनामध्ये ५७ मा कोरोना संक्रमण पोजेटिभ देखिएको सेती प्रादेशिक अस्पतालले जनाएको छ ।

कोरोना संक्रमण पुष्टी भएकामध्ये डडेल्धुराको परशुराम नगरपालिकाका ४ जना पुरुष, डोटीको आदर्श गाउँपालिकाका १४ जना महिला र २३ जना पुरुष, कञ्चनपुरको बेलौरीका एक महिला र दुई पुरुष र भिमदत्त नगरपालिकाका एक महिला र ४ जना पुरुषमा संक्रमित रहेको छ ।

त्यसैगरी कैलालीको भजनीका दुई महिला र ३ जना पुरुष, बर्दगोरीया गाउँपालिका वडा नम्बर २ का एक महिला र दुई पुरुषमा कोरोना देखिएको छ । केही साता यता घट्दै गएको संक्रमण दर फेरी बृद्धि भएको छ । योसँगै सुदूरपश्चिम प्रदेशमा कोरोना संक्रमितको संख्या चार हजार तीन सय ८४ पुगेको छ भने नौँ जनाको मृत्यु भएको छ।