- अर्थ सरोकार सम्बाददाता
बुटवल — गौतम बुद्ध अन्तर्राष्ट्रिय विमानस्थल भैरहवाका कार्यालय सहयोगी विश्वनाथ यादवसहित दुई जनालाई प्रहरीले पक्राउ गरेको छ । अख्तियार दुरुपयोग अनुसन्धान आयोग बुटवलको टोलीले उनीहरुलाई ४ लाख घूस रकमसहित पक्राउ गरेको हो ।
विमानस्थल आयोजनाका लागि जग्गा अधिग्रहण गरेपछि मुअब्जा दिलाउन सहजीकरण गर्ने भन्दै सेवाग्राहीबाट घूस लिइसकेको अवस्थामा उनीहरुलाई रंगेहात पक्राउ गरिएको आयोगका प्रवक्ता सुरेश भुसालले जनाए । पक्राउ पर्ने अर्का व्यक्ति स्थानीय महेन्द्रप्रसाद यादव हुन् । उनलाई मतियारको रुपमा लिइएको छ ।
सेवाग्राहीले मुआब्जा बापत घूस मागेको गुनासो गरेपछि अख्तियारको टोली अनुसन्धानमा खटेको थियो । सिद्धार्थनगर नगरपालिका-५ स्थित सेन्चुरी बैंकबाट उनीहरुलाई रंगेहात नियन्त्रणमा लिएको अख्तियार बुटवलका सूचना अधिकारी भुसालले बताए ।
