• अर्थ सरोकार सम्बाददाता 

काठमाडौँ । पछिल्लो समय सबैभन्दा बढी विवादित सीइओ बनेका जनक शर्मा पौड्याललाई बैंकको संचालक समितिले सोधेको स्पष्टीकरण पत्र बाहिरिएको छ । जनक शर्मा पौड्यालको कार्य क्षमतामाथि प्रश्न उठाउँदै उनलाई सफाईका लागि समय दिएर सोधिएको पत्र अहिले सनराइज बैंकका कनिष्टदेखि बरिष्टहरुको मोबाइल-मोबाइलसम्म पुगेको छ । बैंकका सीइओले राजिनामा दिएजस्तोमात्र गरेको तर पदमै टाँसीएर बसेको भन्दै उक्त पत्र अहिले कर्मचारी तहसम्म सोहि बैंकका उच्च अधिकारीको भाइबरमार्फत पुगेको छ । स्टाफहरुका भाइबरसम्म पत्र आइपुगेपछि एक उच्च अधिकारीले फोटोकपि गरी उक्त पत्र विभिन्न मिडियामा समेत पठाएका छन्। 

यस्तो छ पत्रको विवरण

मिति : २०७७/०४/०८ 

श्री जनक शर्मा पौडेलज्यु 

प्रमुख कार्यकारी अधिकृत 

सनराइज बैंक लि 

विषय सफाई पेश गर्ने सम्बन्धमा 

महोदय ,

उपरोक्त सम्बन्धमा यस सनराइज बैंक लिमिटेडका ५ जना संचालकहरु क्रमश: श्री ओम कृष्ण जोशी, श्री शारदा शर्मा पुडासैनी, श्री बच्छाराज तातेड, श्री शैलेन्द्र गुरागाईं र श्री माल्चंद दुगडले हस्ताक्षर गरी मिति २०७७-०४-०१ मा संचालक समितिका अध्यक्षलाई सम्बोधन गरी Serious Concerns raised by undersigned directors about the managerial capability of CEO of out bank विषयको संलग्न बमोजिमको पत्रमा उल्लेखित विषयमा आज मिति २०७७-०४-०८ गते बसेको बैंकको संचालक समितिको ३५० औं बैठकमा छलफल हुँदा तहाँ र बैंकको संचालक समिति बीच मिति २०७६/०३/२७ मा भएको प्रमुख कार्यकारी अधिकृतको नियुक्ति सम्बन्धी सम्झौतामा भएको व्यवस्था अनुरुप तपाईलाई प्रमुख कार्यकारी अधिकृतको पदबाट किन अवकाश नदिने हो ? अवकाश दिनु नपर्ने कुनै आधार, कारण भए सो प्रमाण सहित कारण समेत उल्लेख गरी सो को चित्तबुझ्दो जवाफ सहित यस पत्रका मितिले ३ कार्य दिन भित्र सफाइ पेश गर्नहुन मौका दिइएको जानकारी गराउँदछु ।

मोतिलाल दुगड 

संचालक समितिका अध्यक्ष 

सनराइज बैंक लिमिटेड