काठमाडौँ । बैंक तथा वित्तीय संस्थाहरुले नक्कली ऋणी खडा गरी ऋण अपचलन गरेको चर्चा समय-समयमा बाहिर आउने गरेको छ । यसपाली महालेखाको प्रतिवेदनले यो चर्चा चर्चा मात्र नभई तथ्य भएको प्रमाणित गरिदिएको छ । बैंक तथा वित्तीय संस्थाहरुले कानुनको धज्जी उडाएर आफुखुसी कर्जा दिने र ऋणको अपचलन गरेकोसमेत पुष्टी भएको छ ।
त्यस्तै बैंक तथा वित्तीय संस्थाले निक्षेप संकलन गर्दा समेत आफ्ना मान्छेहरुलाई वा आफु निकट संस्थाहरुबाट निक्षेप संकलन गर्दा प्रचलित दरभन्दा बढीको ब्याज दिएको समेत पाइएको छ ।
यता ऋणीलाई मौका नै नदिइ उनीहरुको धितो लिलाम गर्ने गरिएको समेत पाइएको छ । बैंक तथा वित्तीय संस्थाका उच्च अधिकारी आपसी मिलोमतोमा नै कृत्रिम ऋणी खडा गरी ऋण दिएको समेत महालेखाको प्रतिवेदनमा उल्लेख छ । ‘कतिपयमा व्यवस्थापकले प्रयोग गर्ने गरी कर्जा प्रवाह भएको देखिन्छ ।’ प्रतिवेदनमा भनिएको छ ।
खराब ऋणीलाई कारवाही गर्ने, असल ऋणीलाई उचित संरक्षण गर्ने तथा निश्चित प्रक्रिया र मापदण्ड पूरा गरेर मात्र कर्जा प्रदान गर्ने व्यवस्था कायम गर्न अनुगमनलाई थप प्रभावकारी बनाउन महालेखाले राष्ट्र बैंकलाई सुझाव समेत दिएको छ ।
