">
- अर्थ सरोकार सम्बाददाता
मुगु । भारत सरकारको आर्थिक सहयोगमा मुगुको एक क्याम्पसको भवन तयार भएको छ । भारत सरकारको तीन करोड ५० लाख ११ हजार आर्थिक सहयोगमा मुगुको रातापानीस्थित श्री महादेव मस्त चतुर्देव क्याम्पसको प्रशासनिक तथा शैक्षिक भवन तयार गरिएको हो । उक्त भवनको उद्घाटन गाउँ विकास परिषद्, विद्यालय व्यवस्थापन समिति र काठमाडौंस्थित भारतीय राजदूतावासका प्रतिनिधिले एक समारोहबीच भिडियो कन्फरेन्समार्फत गरेका हुन् ।
सन् २००७ मा स्थापना भएको उक्त क्याम्पस समुदायको स्वामित्वको शैक्षिक संस्थान हो । विश्वविद्यालय अनुदान आयोग (युजिसी) बाट स्वीकृति प्राप्त यस क्याम्पस त्रिभुवन विश्वविद्यालयसँग आबद्ध छ । क्याम्पसले चार वर्षे स्नातक तहको पठनपाठन सञ्चालन गरेको छ । हुम्ला र बाजुरा लगायत २४ भन्दा बढी गाउँका विद्यार्थी अध्ययनरत यस क्याम्पसमा विद्यार्थीका लागि छात्रवृत्तिको व्यवस्था पनि गरिएको छ ।
नयाँ प्रशासकीय तथा शैक्षिक भवन निर्माणको कार्यान्वयन जिल्ला समन्वय समितिले गरेको हो । यस नवनिर्मित संरचनाले विद्यार्थीहरुको सिकाई वातावरणलाई अभिवृद्धि गर्ने अपेक्षा गरिएको भारतीय दूतावासले गरेको छ।
