">
- अर्थ सरोकार सम्बाददाता
नेपालगञ्ज । नेपालगञ्जको त्रिभुवन चोकमा दैनिक काम खोज्न जम्मा हुने मजदुरको कोरोना परीक्षणका लागि स्वाब संकलन सुरु गरिएको छ । बिहीबारबाट स्वाब संकलन सुरु गरिएको बाँकेका कोरोना फोकलपर्सन नरेश श्रेष्ठले जानकारी दिए । कसौधन वैश्य समाज र नेपाल रेडक्रस सोसाइटीको सहयोगमा स्वास्थ्य कार्यालयले स्वाब संकलन सुरु गरेको जनाइएको छ । प्रमुख जिल्ला अधिकारी रामबहादुर कुरुम्बाङ र समाजका अध्यक्ष नन्दलाल वैश्यलगायतको उपस्थितिमा स्वाब संकलन गरिएको फोकलपर्सन श्रेष्ठले जानकारी दिए ।
मजदूरसँगै त्रिभुवन चोक आसपासका पसल र घरका सदस्यको समेत कोरोना परीक्षणका लागि स्वाब संकलन गरिने बताइएको छ । उनका अनुसार ३६५ जनाको नाम दर्ता गरेकोमा बिहीबार १३० जनाको स्वाब संकलन गरिएको छ।
