• अर्थ सरोकार सम्बाददाता 

काठमाडौं । विश्वभर फैलिएको कोरोना संक्रमणको कारण विदेशमा यो साता थप १६ जना नेपालीको मृत्यु भएको भएको छ । गैरआवासीय नेपाली संघ (एनआरएनए)ले दिएको जानकारी अनुसार कोरोना संक्रमणबाट मृत्यु भएको १६ जनासंगै मृत्यु हुने नेपालीहरुको संख्या दुई सय पुगेको छ ।

गैरआवासीय नेपाली संघ अन्तर्गतको स्वास्थ्य समितिका संयोजक डा. संजीव सापकोटाका अनुसार यो साता कतारमा ८ जना, कुवेतमा ३ जना, युएईमा ५ जनाको मृत्यु भएको छ ।

समितिका अनुसार २० देशमा रहेका नेपालीहरु पूर्णरुपमा कोरोना मुक्त भएका छन् । संघका अनुसार जम्मा कोराना संक्रमितमध्ये ९३ प्रतिशत नेपालीहरु कोरोना संक्रमणबाट मुक्त भएका छन् । अफ्रिकी मुलुकमा कोरोना भाइरसबाट संक्रमित नेपालीमध्ये सबैजना कोरोना भाइरसबाट मुक्त भएका छन् ।

विदेशमा ३० हजार ५ सय ७१ जनामध्ये २८ हजार ६ सय ८१ जना नेपाली संक्रमण मुक्त भएको गैरआवासीय नेपाली संघले जनाएको छ ।