• अर्थ सरोकार सम्बाददाता 

काठमाडौँ । नेपाल राष्ट्र बैंकले १ सय ४२ जना ऋणीलाई पुनर्कर्जा दिने निर्णय भएको छ । नेपाल राष्ट्र बैंकले पुनर्कर्जा कार्यविधि २०७६ बमोजिम आर्थिक वर्ष २०७६-७७ मा साधारण तथा निर्यात पुनर्कर्जा प्राप्त गर्ने ऋणी संस्था तथा बैंकको नाम सार्वजनिक गरेको हो । साधारण पुनर्कजातर्फ १३२ ऋणी र निर्यात पुनर्कर्जा व्यवसायतर्फका १० ऋणीले ऋण पाउने भएका हुन् ।

राष्ट्र बैंकले कोरोना भाइरस महामारीका कारण साँवा र ब्याजसमेत भुक्तानी गर्न नसक्ने ऋणीहरुलाई पुनर्कर्जा दिने भएको हो । पर्यटन, होटल, स्टिल, सिमेन्ट, आयात निर्यात गर्ने कम्पनी, उत्पादन मुलक उद्योगमा संलग्न ऋणीलाई पुनर्कर्जा उपलब्ध गराइएको छ।

बैंकहरुले पुनर्कर्जाको आवश्यकता पर्ने ऋणीहरुसँग निवेदन माग गरेका थिए । बैंकहरुले ऋणीको निवेदनलाई आन्तरिक मूल्यांकनपछि राष्ट्र बैंकसँग प्रस्ताव लैजाने व्यवस्था छ । सोही अनुसार बैंकहरुले बुझाएको विवरणका आधारमा राष्ट्र बैंकले पुनर्कर्जा दिने निर्णय गरेको हो । जससंगै  १४२ ऋणीले ऋण पाएका हुन् ।