- अर्थ सरोकार सम्बाददाता ।
वीरगञ्ज । स्रोत नखुलेको २ लाख रुपैयाँसहित प्रहरीले १ जना पक्राउ गरेको छ । धोविनी गाउँपालिका– १ पिपरा बस्ने जय प्रकाश पटेल पक्राउ परेका हुन् । सशस्त्र प्रहरी बोर्डर आउट पोष्ट भिखमपुरबाट खटिएको टोलीले जगरनापुर गाउँपालिका–२ दशौताबाट उनलाई पक्राउ गरेको हो ।
ना २१ प ९४३१ नम्बरको मोटरसाइकलमा सवार पटेललाई चेकजाँच गर्ने क्रममा २ लाख रुपैयाँ बरामद भएको सशस्त्र प्रहरीले जनाएको छ । रकमको स्रोत खुलाउन नसकेपछि मोटरसाइकलसहित उनलाई नियन्त्रणमा लिइएको हो । थप अनुसन्धानका लागि उनलाई जिल्ला प्रहरी कार्यालय पर्सामा बुझाइएको छ । घटनाबारे थप अनुसन्धान भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक मनोजीत कुँवरले बताए ।
