- अर्थ सरोकार सम्बाददाता
काठमाडौँ । जनक शर्मा पौड्याल सनराइज बैंकमा नरहने निश्चित भएपछी उनीसँगै वा उनकै पहलमा सनराइज बैंक प्रवेश गरेकाहरुको जागिर पनि धरापमा परेको छ । सीइओ पौड्यालसँगै उनले बैंक भित्र्याएका व्यक्तिहरुमा पनि समस्या रहेको आन्तरिक निष्कर्षसहित बोर्डमा कुरा उठेपछि उनीहरुको जागिर धरापमा परेको हो । उनले आफुलाई काम गर्न सहज हुने भन्दै विशेषगरी ग्लोबल आइएमइ बैंकबाट केहि उच्च अधिकारीहरु भित्र्याएका थिए । तर सीइओ पौड्यालको कार्यक्षमतामाथि नै प्रश्न उठेपछि अव उनले बैंक ल्याएका उच्च अधिकारीहरुको पनि खास काम गराईको अर्थ नभएको निष्कर्षमा लगभग बैंक बोर्ड पुगिसकेको छ ।
अन्य डेपुटी सीइओ हुँदा हुँदै सीइओ पौडेलकै पहलमा ग्लोबल आइएमइ बैंकबाट आरती राणा सनराइज भित्रिएकी थिइन् । उनलाई नै काम गर्न सहज होस् भनेर ग्लोबल आइएमइ बैंक कसरी छोडौं भनेर जागिर खोजिरहेका अरु केहि कर्मचारीहरु पनि पौड्यालकै पहलमा सनराइज भित्रिएका थिए । पौड्यालकै अघि पछी लागेर करियर बनाउँछु भनेर भ्रम पाल्नेहरुदेखि साच्चै राम्रो काम गर्नेहरुसम्म पनि एउटै ‘घान’मा पर्दा अव केहिको करियरमा दाग लाग्ने देखिएको छ । यसले एकातर्फ जो कोहि पनि व्यक्ति केन्द्रित होइन संस्था केन्द्रित हुनुपर्छ भन्ने पाठ एकातर्फ सिकाएको छ भने अर्कोतर्फ लामो समयदेखि विभिन्न बैंकहरुमा हुँदै आएको व्यक्तिकेन्द्रित नियुक्तिमाथि पनि प्रश्न उठाएको छ ।
राम्रो काम गर्नेहरु पनि मारमा !
यसो त सनराइजका सीइओ र बोर्डबीचको टसलले सनराइजभित्र केहि राम्रो काम गर्नेहरु पनि मर्कामा परेका छन् । ग्लोबल आइएमइ बैंकमा सार्है राम्रो काम गरेर राम्रो छवि बनाएकी आरती राणा सनराइज आएसँगै विवादित छिन् । कोरोनाका संकटका बेला लकडाउन उल्लङ्घन गर्दा झन्डै सजायको भागेदार बनेकी उनी सीइओ पौड्यालकै कार्यशैलीका कारण बोर्डका केहि संचालकहरुको बैंकबाट निकालिनुपर्ने लिष्टमा परेको चर्चा बैंकभित्र सुरु भइसकेको छ । ‘हामीले पौड्यालजीमाथि खुब विश्वास गरेका थियौं । उहाँका प्रतिबद्धताहरु पनि मिठा थिए । तर सब झुठा रहेछन् भन्ने प्रमाणित भयो । उहाँले मलाई काम गर्न केहि मेरा नजिकका मान्छेहरु ल्याउनुपर्यो भनेर आरतीजीहरु ल्याउनुभएको थियो । हामीले पनि उहाँलाई काम गर्न सजिलो हुँदा राम्रै हुन्छ भन्ने ठानेका थियौं । तर प्रतिबद्धताहरु पूरा नभएपछि अव उहाँमात्र होइन उहाँकै बलले बैंक आउनुभएकाहरु पनि सनराइजमा रहनुको कुनै औचित्य छैन ।’ एक संचालकले अर्थ सरोकार डटकमसँग भने, ‘माउ नै ठिक भएनन्, चेलाहरुसँग आश छैन…’
